بداية دائرة الادمان
مرض الإدمان بيبتدي بالشكل ده
شخص عنده عوامل بتخليه مدمن: عوامل وراثية وعوامل في البيئة المحيطة زي الزمايل والجيران وأصحاب الشارع، طبعا مع شوية أخطاء في التربية سواء العنف والقهر أو الدلع الزيادة. والأهم هو استعداد الشخص النفسي، زي مثلا أنه يكون عنده مخاوف من حاجات مش قادر يمسكها بإيده: زي المستقبل والتغيير والنجاح والفشل والألم والمجهول. ويبتدي يدور على أصحاب شمال - اصدقاء السوء يعني - يكونوا أكبر منه في السن. سمة شخصية تانية مهمة في المدمن: إنه مش بيعرف يعبر عن أحاسيسه ومشاعره وعنده عدم تقدير لعواقب الأمور وأناني كمان
ومع كل ده بيدفعه فضوله لتجربة المخدر لأول مرة وعند اللحظة دي بيبتدي يكتشف لأول مرة إن مشاكله السابقة اتحلت و بقى فجأة بيعرف يعمل اللي مكنش بيعرف يعمله (حسب رؤيته هو) وطبعا محدش من أهله بيكون عارف ولا متخيل أن ابنهم بدأ في السكة دي. المدمنين بيسموها مرحلة الحفلة عشان بيشوفوا الدنيا لأول مرة حلوة وفاتحالهم دراعتها. بعد كده بيبدأ يتكشف وبتبدأ سلوكياته تتغير
يصحى متأخر ويسهر
يكدب ويلف ويدور
يُسقط اخطاؤه على الناس اللي حواليه
فلوسه رايحة أول بأول فيبيع حاجته ويسرق
يفشل في كل حته في حياته وخسايره بتزيد اكتر واكتر
المشكلة الكبيرة والمصيبة الحقيقية في الإدمان هي الإنكار. ودي الحيلة الدفاعية غير الواعية اللي بتخليه مش عايز يعترف ان في مشكلة أساساً وده بيكون بدون وعي عشان كده بيفضل مستمر في التعاطي لحد ما يجيب قاع